Histurjalatj bäjjve bidumsáme giellaj

Njukktjamáno 8. bäjjve lij märrkabäjjve bidumsáme giellaj: Dan biejven Vuona Sámedigge ållestjåhkålvas duhkkida akktajienalatjat bidumsáme ja ubmejsáme gielajt ietjráđálatj ja särralágatj giellan. Dát lä ájnas lávvke sáme giellamåddäbielakvuoda várrjalieme ja åvdedieme gidda, ja duhkkidiebme merrki dåjvov gu båhtejájjge litj buorep daj gielajda ja sáme kultuvvraj.

Mierrádustäkksta jårrgåluvvum bidumsábmáj

Sámedigge duhkkuda bidumsámev sáme giellan Vuona sinnä. Sámedigge bajemus ulbme lä bidumsáme giellaälládahttem Vuona bielen Sámeiednamist.

Sámedigge mejdni gu lä ájdnasat buorre ja lahka akktasatjbarrgo Nuarrtalánda fyllkakommuvnajn, ja dán ulbmáj lä akktasatjbarrgo mij lä juo tjáleduvvum buorre nävvo.

Sámedigge mejdni gu institusjuvnalatj vásstádis lä därbuladtjat birrguj ninniduvvumin ja åvdediemijn bidumsáme gielav, ja lä gárves dårrjot dággár bargov. Sámedigge mejdni gu lä ávkálatjat stimulerit akktasatjbirrguj ráje gasskat áhtä bidumsáme gielav älládahttet Vuonabielen.

Dåjmå lä gåtseduvvum jahkásatj budsjiehtajn.

Sámedigge gallgá:

1. Viehkedit rejjdit jut litj máhttelis ásadit vassjalis bidumsáme giellabirrasav Vuonabielen.
2. Barrgat állgemin akktasatjvuodav rijka gaskan ahtä älládahttet bidumsáme gielav Vuonabielen.
3. Barrgat dasa gu bidumsáme bájjkenama litj registreriduvvum Guovdálatj bájjkenammalåhkoj áhtä litj máhttelis dajt adnet ilmuladtjat igip navtä sjyltajn ja kártajn.
4. Ásadit iehtja prioriterimijt budsjiehtan áhtä bidumsáme gielav ninnidit ja älládahttet.
5. Barrgat dasa gu bidumsáme giella litj nammaduvvum vuona lágaj sinnä gånnä sáme giela lä nammaduvvum, igip navtä sámelágan, lieraduslágan ja älbmuklågon.
6. Barrgat dasa gu bidumsáme udtju tjellgiduvvut Vuona guavvlo- jala minoritiehtagielaj sinnä mij lä várrjaluvvum europealatj giellalihto mildi.
7. Barrgat dasa gu litj bidumsámelieradus skåvlån, gu lä bidumsáme guhkáslieradus, ja gu lä lieraduvvum bidumsámelieradiejje.
8. Ietján gallgá Sámedigge gåtsedit dåjmåjt ja strategijajt ma lä gehttum diedádasa Pitesamisk språk på norsk side : situasjonen no og tiltak for framtida sinnä.

Máhtá lässtit vulus mierrediemev ja ássjebáhppárijt dásstä:

>> Les på norsk >>