«Same soga laula», jala «Sámemáddo lävvludis» bidumsámen (áj tjáleduvvum «Sáme vierrega lävvludis»), lä dikkta ja lävvludistäkksta mij Isak Saba tjälij. «Same soga laula» lä jårrgåluvvum varrga gájk sámegielajda — 2022 áj bidumsábmáj.
Sámemáddo lävvludis
- Allen nuarrtan Sarvá vuolen
ihtá suojmat Sämij iednam.
Guävvdel duogen guävvdel vujdnu,
jávvre dullvi jávre lahka.
Tjåhkå gåron, tjåltå vuomen
bajedimen alme vuässtä.
Sjåvvåj jågå, sjuvvaj vuome,
tsähki práđa stállenjárga
davás sievvaj skåvvåmin.
- Dállveájgen bållåsbieggajn,
muohtabårrgå mieredahtá.
Sámevierrek selujn, mielajn
ähttsá lijjká iednamijdes:
Vándardäjje mánnodieben,
guoksagasa bulli almen,
ruosjkast, ruovgast rådojn gullu,
juhtsa jävrijn, jalga rájest,
gärrisjuhtsa gejnuj mit.
- Ja gu giessebäjjve gullij
mehtsijt, sievajt, sievvagäddijt,
gålle sinnä guollebivdár
manná sievan, manná jävrijn.
Gållen tjuvvgi tjáhtselådde,
sillban sjuvvi sámeieno,
gilldi stággo, gilldi ájro,
minni ålbmá lávlodimen
guojkajt, fuorsajt, uggij mit.
- Sämij iednam’ máddoguäddej
dat lä gärrdam dujjudagá
gåddejtjuđijt, rievvárbuvdajt
sluogas, fálskes skáhttesundijt.
Guddne dunji, sávres máddo!
Guddne dunji, ráfe ruohtas!
Iele dåro dåroduvvum,
iele vieljaj vara varrdám
sämij sjávodis máddo sin.
- Máddarájjámä lä dålen
viddnim ássjáladtjaj bajjel.
Vuasstálisstup, vielja, mij gie
sävvrudagajn vuoledäjjáj!
Biejve bärdnij sávres máddo!
Dån i gåssäk dähpput verrti
jus bär värri gållegielavt,
mujtá máddarmáddoj bágojt:
Sämij iednam sämijda!
[…] «Sámemáddo lävvludis» (Isak Saba: «Same soga laula») […]
[…] Sámemáddo lävvludis (sämij älbmuklävvludis bidumsámen) […]
[…] Sámemáddo lävvludis (den samiske nasjonalsangen på pitesamisk) […]